Qishloq xo‘jaligini mexanizatsiyalashtirish
KASBI HAQIDA BATAFSIL MA`LUMOT

Yo'nalish Kodi	3430100
Kasbiy mutaxassisliklar	Qishloq xo'jaligi mashina va jihozlariga texnik xizmat ko'rsatish mexanigi.
Ixtisosliklar	O‘rta maxsus (qishloq xo‘jalik mashina va jihozlaridan foydalanish va texnik xizmat ko‘rsatish chilangar-mexanigi, mexanizatsiyalashgan chorvachilik majmualari texnigi, elektrogazpayvandchi, keng profilli traktorchi, “V” yoki “VS” toifali haydovchi) - qishloq xo‘jaligi (agrosanoat) kasb-hunar kollejlari; Oliy (qishloq xo‘jaligini mexanizatsiyalashtirish, qishloq xo‘jalik texnikasini loyihalashtirish va konstruksiyasini ishlash, qishoq xo‘jalik mahsulotlarini qayta ishlash jihozlariga texnik servis xizmatini ko‘rsatish, avtomatlashtirish va ulardan foydalanish) - qishloq xo‘jalik institut(akademiya, universitet)lari va texnika oliy o‘quv yurtlari.
Qobiliyatlar	qandaydir o‘ziga xos qobiliyat talab etilmaydi, lekin texnikaga qiziqish, texnik fikrlash, kasbiy mustaqillik va mas’uliyat, ohistalik, aniq mo‘jalli harakatlar, jismoniy chidamlilik zarur.
Fanlar	fizika, kimyo, biologiya, ona tili va adabiyot, jismoniy tarbiya, chet tili, chilangarlik ishi, informatika va axborot texnologiyalari, “Texnik ijodkorlik” to‘garaklaridagi mashg‘ulotlar.
Mazmuni	Qishloq xo‘jalik korxonalari, mashina traktor parklarida - qishloq xo‘jalik texnikalarini ishga tayyorlash, ularga texnik xizmat ko‘rsatish va ta’mirlash, ishga yaroqsizlik sabablarini aniqlash va ularni bartaraf etish, qishloq xo‘jalik mashinalarini boshqarish, ularni saqlash; CHorvachilik, parrandachilik, baliqchilik, fermalari va komplekslarida – ozuqa tayyorlash mashina va jihozlariga texnik xizmat ko‘rsatish va ta’mirlash; Ilmiy tadqiqot institutlarida - qishloq xo‘jalik texnikasini loyihalashtirish va konstruksiyasini ishlash.
Afzalliklar	“kelajagi porloq” kasb; zamonaviy texnika bilan ishlash; kasb vakillariga ehtiyojning yuqoriligi; ilmiy salohiyatni oshirish; ixtirochilik bilan shug‘ullanish; shaxsiy firmaga ega bo‘lish imkoniyatlari.
Kasbiy qiyinchiliklar	ko‘rish va asab tizimining toliqishi; mexanik, elektr shikastlanishlar olish xavfi; yuqori kasbiy mas’uliyat; smenali ish.
Batafsil ma`lumot	Qishloq xo‘jaligi mashina va jihozlariga texnik xizmat ko‘rsatish mexanigi – mulk turidan qat’i nazar, qishloq xo‘jaligi korxonalarida chorvachilik uchun ozuqa tayyorlash mashina va jihozlari, avtomobillar, qishloq xo‘jalik mashinalari, traktorlarga texnik xizmat ko‘rsatish va ularni ishlatish bo‘yicha mutaxassis sifatida faoliyat ko‘rsatadi. Uning majburiyatlariga tuproqqa ishlov berish, ekish va yig‘ishga oid texnikalarni ishga tayyorlash; parrandachilik, chorvachilik ferma yoki komplekslarida mashina va jihozlarga texnik xizmat ko‘rsatish; texnik hujjatlarga ko‘ra, qishloq xo‘jaligi va meliorativ texnika vositalariga texnik xizmat ko‘rsatish, ta’mirlash, yaroqsizligi bo‘yicha tashxis qo‘yish; ta’mirdan keyin ularni sinovdan o‘tkazish, ayrim qismlari uchun metrologik nazoratni o‘tkazish; elektr o‘lchov va avtomatik elektr asboblarni ta’mirlash; qishloq xo‘jaligi texnikalarini to‘plash va ularni saqlash kabi vazifalar kiradi. Demak, siz kollejni bitirganingizda ana shunday ishlarni bajara olishga tayyor bo‘lishingiz hamda engil va yuk avtomobillarini ham boshqara olishingiz lozim. SHuningdek, traktor, avtomobil va qishloq xo‘jalik mashinalarining tuzilishi va ishlashi; qishloq xo‘jalik va chorvachilik mahsulotlari etishtirish agrotexnikasi va texnologiyasi; qishloq xo‘jalik mahsulotlarini saqlash, ularga birlamchi ishlov berishning intensiv texnologiyalarini; ishlab chiqarish jarayonini avtomatlashtirishga oid bilimlarga ega bo‘lishingiz hamda chilangarlik, elektrogazpayvandchilik, tokarlik va temirchilik ishlarini ham eplashingiz kerak. Xulosa qilib aytadigan bo‘lsak, ushbu kasb egalarining ish vaqti, ish hududi, ish ko‘lami chegaralanmagan, axir qishloq xo‘jaligining qaysi sohasini texnikalarsiz tasavvur qilish mumkin?! Qiyin emasmi? Temirlarga “jon kirita” olasizmi? SHunday bo‘lsa, bu kasbni tanlashda adashmagansiz.