Navoiy erkin iqtisodiy zonasi
O‘zbekiston Respublikasining Birinchi Prezidenti I.Karimovning 2008 yil 2 dekabrdagi PF-4059-sonli “Navoiy” erkin industrial-iqtisodiy zona tashkil qilish to‘g‘risidagi farmoniga asosan tashkil qilindi. “Navoiy” erkin iqtisodiy zonasi Navoiy viloyatining Karmana tumanidagi 500 gektarli yer uchastkasida joylashgan. 2016 yil holatiga ko‘ra Navoiy viloyatida xorijiy investitsiyalar ishtirokidagi zamonaviy korxonalar soni 55 tani tashkil etadi. Shundan, Navoiy shahrida 18 ta, Zarafshon shahrida 4 ta, Karmana tumanida 23 ta, shundan “Navoiy” erkin iqtisodiy zonasi hududida 18 ta, Konimex, Navbahor va Qiziltepa tumanlarida 2 ta, Nurota, Tomdi, Uchquduq va Xatirchi tumanlarida 1 tadan xorijiy investitsiya ishtirokidagi zamonaviy korxonalar faoliyat olib bormoqda.
O‘zbekiston Respublikasining Birinchi Prezidenti I.Karimovning 2013 yil 18 martdagi “Jizzax” maxsus industrial zonasini barpo etish to‘g‘risida”gi farmoniga asosan tashkil qilindi. “Jizzax” erkin iqtisodiy zonasida 19 zamonaviy korxona ishga tushirildi. Erkin iqtisodiy zonaning Jizzax shahridagi hududida 363,7 gektar maydonda 14, Sirdaryo viloyatidagi filialining 150 gektar maydonida 5 loyihani amalga oshirishgan va korxonalarda mingdan ortiq yangi ish o‘rni yaratilgan.Hozirgi kunda “Jizzax” erkin iqtisodiy zonasida avtomobillar va yuk mashinalari uchun tormoz kolodkalari, televizor, konditsioner, muzlatkich, kir yuvish mashinasi, mikroto‘lqinli pech, svetodiodli lampalar, polipropilen iplar, video va IP telefonlar, telekommunikatsiya uskunalari, internet tezligini oshiruvchi butlovchi qismlar kabi turli sanoat mahsulotlari ishlab chiqarilmoqda.
O‘zbekistonning Birinchi Prezidenti Islom Karimovning 2013 yil 13 apreldagi PF-4436- sonli “Angren” maxsus industrial zonasini barpo etish to‘g‘risidagi Farmoni hamda O‘zbekiston Respublikasi Prezidenti Shavkat Mirziyoyevning 2016 yil 26 oktyabrdagi farmoniga muvofiq ushbu hudud “Angren” erkin iqtisodiy zonasi deb ataldi hamda imkoniyatlari va imtiyozlari kengaytirildi. “Angren” erkin iqtisodiy zonasida bugungi kunda quyidagi ishlab chiqarish korxonalari faoliyat olib bormoqda. “Poli teknoloji”korxonasida konveyer lentalari, qishloq xo‘jaligi texnikasi va avtomobil shinalari ishlab chiqarish yo‘lga qo‘yilgan.“Angren” shakar zavodining foydalanishga topshirilishi bilan bu yerda yiliga 300 ming tonna tayyor mahsulot yetkazib berish imkoniyati yaratildi. Angren quvur zavodi misdan yiliga 8 ming tonna elektrotexnika, kimyo sanoati, xalq xo‘jaligining turli tarmoqlari uchun zarur hisoblangan quvurlarni ishlab chiqarishga ixtisoslashgan.
O‘zbekiston Respublikasining Prezidenti Sh.Mirziyoyevning 2017 yil 12 yanvardagi N PF-4931- sonli “Urgut”, “G‘ijduvon”, “Qo‘qon” va “Hazorasp” erkin iqtisodiy zonalarini tashkil etish to‘g‘risidagi farmoniga asosan “G‘ijduvon” erkin iqtisodiy zonasi tashkil etildi. EIZ hududida 3 farmsanoat, 3 qurilish, 3 yengil sanoat va poyabzal, 1 kimyosanoat, 2 elektrotexnika mahsulotlari, 3 meva-sabzavotlarni qayta ishlash va oziq-ovqat mahsulotlarini ishlab chiqaradigan korxonalar qurilishi rejalashtirilgan.
O‘zbekiston Respublikasining Prezidenti Sh.Mirziyoyevning 2017 yil 12 yanvardagi N PF-4931- sonli “Urgut”, “G‘ijduvon”, “Qo‘qon” va “Hazorasp” erkin iqtisodiy zonalarini tashkil etish to‘g‘risidagi farmoniga asosan “Hazorasp” erkin iqtisodiy zonasi tashkil etilgan bulib, bugungi kunda “Hazorasp” erkin iqtisodiy zonasi uchun yer uchastkasi ajratilib, uni zarur muhandislik-kommunikatsiya infratuzilmasi bilan ta’minlash ishlari boshlab yuborilgan. Hozirgacha ushbu hududda yengil sanoat, mashinasozlik, elektrotexnika, farmatsevtika, charm-poyabzal, qurilish materiallari ishlab chiqarish quvvatlarini joylashtirish bo‘yicha 50 dan ortiq loyiha tayyorlanyapti.
O‘zbekiston Respublikasining Prezidenti Sh.Mirziyoyevning 2017 yil 12 yanvardagi N PF-4931- sonli “Urgut”, “G‘ijduvon”, “Qo‘qon” va “Hazorasp” erkin iqtisodiy zonalarini tashkil etish to‘g‘risidagi farmoniga asosan “Urgut” erkin iqtisodiy zonasi tashkil etildi. Urgut tumanida “Urgut-1”, Nurobod tumanida “Urgut-2” va Pastdarg‘om tumanida “Urgut-3” hududlarida tashkil etilgan. Ushbu hududlar uchun jami 816 gektar yer ajratilgan.. Bugungi kunda “Urgut” erkin iqtisodiy zonasida 2017-2018-yillarga mo‘ljallangan 83 loyiha tayyorlangan bo‘lib, ularning 20 tasi joriy yilda ishga tushirilishi rejalashtirilgan va oziq-ovqat va yengil sanoat, charm-poyabzal, farmatsevtika, mebel va qog‘ozni qayta ishlash, elektrotexnika, qurilish materiallari ishlab chiqarish, neft-kimyo va boshqa sohalarda ko‘zda tutilayotgan loyihalar asosida zamonaviy ishlab chiqarish korxonalari qurilishi rejalashtirilgan.
O‘zbekiston Respublikasining Prezidenti Sh.Mirziyoyevning 2017 yil 12 yanvardagi N PF-4931- sonli “Urgut”, “G‘ijduvon”, “Qo‘qon” va “Hazorasp” erkin iqtisodiy zonalarini tashkil etish to‘g‘risidagi farmoniga asosan “Qo‘qon” erkin iqtisodiy zona barpo qilindi. “Qo‘qon” erkin iqtisodiy zonasi uchun 709 gektar yer maydoni ajratilgan bo‘lib, shu kunga qadar 18 yirik loyiha bo‘yicha qurilish ishlari boshlab yuborildi. Ushbu hududda amalga oshirilishi rejalashtirilgan loyihalarga muvofiq, bu yerda to‘qimachilik, oziq-ovqat sanoati, mashinasozlik, elektrotexnika, farmatsevtika, mebelsozlik, poligrafiya, charm-poyabzal va qurilish materiallari ishlab chiqarish yo‘lga qo‘yiladi.