SHahar qurilishi va xo‘jaligi
KASBI HAQIDA BATAFSIL MA`LUMOT

Yo'nalish Kodi	5540300
Kasbiy mutaxassisliklar	Obodonlashtirish bo'yicha texnik, turar joy va jamoat binolaridan foydalanish va ko'chmas mulkni ro'xatga oluvchi, lift va ko'tarma mexanizmlardan foydalanish va ta'mirlash texnigi.
Ixtisosliklar	O‘rta maxsus (obodonlashtirish ob’ektlaridan foydalanish, ta’mirlash, va bog‘-park qurilishi texnigi, attraksion uskunalariga xizmat ko‘rsatish va ta’mirlash texnigi, ko‘kalamzorlashtiruvchi texnik, ko‘chmas mulkni baholash va davlat ro‘yxatidan o‘tkazish texnigi, turar joy va jamoat binolaridan foydalanish texnigi, lift va ko‘tarma mexanizmlardan foydalanish va ta’mirlash bo‘yicha texnik-mexanik, elektromontyor, lift va ko‘tarma mexanizmlarga dispetcherlik xizmati ko‘rsatish operatori) – qurilish kollejlari. Oliy (binolar va shahar hududlarini qayta qurish, tiklash, obodonlashtirish va ulardan foydalanish, shahar transporti xo‘jaligi va aloqa yo‘llari) –arxitektura-qurilish institutlari, texnika oliy o‘quv yurtlari.
Qobiliyatlar	ishchanlik, mas’uliyat, sinchkovlik, diqqat va yaxshi xotira.
Fanlar	matematika, fizika, chizmachilik, jismoniy tarbiya, ona tili, chet tili, texnologiya, chilangarlik ishi,
Mazmuni	SHahar qurilishi va xo‘jaligi tizimida – obodonlashtirish, bog‘-park qurilishi, ko‘kalamzorlashtirish ishlarini tashkillashtirish, attraksion uskunalariga xizmat ko‘rsatish, lift va eskalatorlardan foydalanish, ta’mirlash, lift va eskalatorlarga dispetcherlik xizmati ko‘rsatish; Davlat raqobat qo‘mitasi hududiy boshqarmalarida - ko‘chmas mulkning mavjudligini aniqlash yoki uni tugatish; ko‘chmas mulk ob’ektlarini texnik inventarizatsiya qilish; o‘zboshimchalik bilan qurilgan ob’ektlarga doir faktlarni aniqlash.
Afzalliklar	turg‘un ish va ish haqi; shaxsiy biznesini yo‘lga qo‘yish imkoniyati.
Kasbiy qiyinchiliklar	yuqori kasbiy mas’uliyat; ba’zida nizoli holatlarning kelib chiqishi; hamma vaqt xavfsizlik texnikasi qoidalariga rioya qilish zaruriyati; ruhan va jismonan qiyin ish.
Batafsil ma`lumot	Obodonlashtirish va ko‘kalamzorlashtirish bo‘yicha texniklarning vazifasi ko‘pchilikka yaxshi tanish, chunki har kun ertalabdan biz ularning mehnatiga guvoh bo‘lamiz. Erta tongdan ko‘chalarni supurish, axlatlarni olish, gul va daraxtlarni sug‘orish kabi yumushlarni kimdir qilishiga, ya’ni beminnat xizmatga o‘rganib qolganmiz. Bugun ularning xizmat vazifalari nafaqat obodonlashtirish ob’ektlaridan foydalanish va ko‘kalamzorlashtirish, balki bog‘-parklar yaratish va attraksion qurilmalarga xizmat ko‘rsatish va ta’mirlash ishlarini ham qamrab olgan. Turar joy va jamoat binolaridan foydalanish, davlat ro‘yxatidan o‘tkazish inspektori - ko‘chmas mulkni hisobga olish, ro‘yxatdan o‘tkazish, ularga tegishli kadastr hujjatlarini tuzish bilan shug‘ullanadigan mutaxassis. Uning majburiyatlariga: ko‘chmas mulkning mavjudligini aniqlash yoki uni tugatish; ko‘chmas mulk ob’ektlarini texnik inventarizatsiya qilish; o‘zboshimchalik bilan qurilgan ob’ektlarga doir faktlarni aniqlash; davlat kadastriga ko‘chmas mulk to‘g‘risidagi ma’lumotlarni kiritish kabi vazifalar kiradi. Inspektor kadastr hisobi uchun quyidagilarni o‘zida aks ettirgan hujjatlarni ham tayyorlaydi: ob’ektning nomi ( bino, inshoot, hovli joy, dala hovli, garaj, kvartira, bino qismi, noturar joy, hovli joy qismi, kvartira qismi); manzili, joylashgan joyi, bir manzilda joylashgan bir nechta ob’ektlarning tuzilishi va literlarini; qavatlar soni; ob’ektning yuzasi. Bundan tashqari, har bir qavat rejasi va eksplikatsiya yordamida binolarning texnik pasportlarini va ulardan ko‘chirmalarni tayyorlash; ko‘chmas mulk ob’ektlarini baholashda ishtirok etish va tegishli hujjatlarni rasmiylatirish; ob’ektlarning eskirganligiga oid faktlarni aniqlash ham uning majburiyatlari hisoblanadi. Juda qiziqarli kasb, lekin uni egallash oson emas. Buning uchun siz fuqarolik va er kodeksini; kadastr xizmatiga doir me’yoriy hujjatlarni; ko‘chmas mulkni inventarizatsiya qilish, baholash, yuzalarini o‘lchash texnologiyalarini va xizmatga doir hujjatlarni rasmiylashtirish qoidalarini juda puxta o‘zlashtirib olishingizga to‘g‘ri keladi. Qiyin emasmi? Ishchanlik, mas’uliyat, sinchkovlik, diqqat va yaxshi xotiraga ega bo‘lsangiz, ikkilanishga hojat yo‘q. Omad!