Geologiya
KASBI HAQIDA BATAFSIL MA`LUMOT

Yo'nalish Kodi	5140800
Kasbiy mutaxassisliklar	Geologiya qidiruv ishlari texnigi, geologiya qidiruv quduqlarini burg'ulovchi texnik.
Ixtisosliklar	O‘rta maxsus (texnik-geolog, kollektor, kuzatuvchi-gidrogeolog, geologik namunalar saralovchisi, gemmolog, burg‘ulash qurilmasi mashinisti, burg‘ulash jihozlarini ta’mirlash chilangari, yuvuvchi laborant, geologik quduqlar va shpurlar burg‘ulovchisi) – sanoat, qishloq xo‘jalik, ekologiya kollejlari; Oliy (geolog, geotektonik , geokimyogar, minerolog, kristallograf, petrograf , uran geokimyogari va minerologi, geologik s’yomka va foydali qazilmalar konlarini qidiruvchi) – agrar universitetlar, qishloq xo‘jalik, texnik va geologiya, tog‘-kon institutlari.
Qobiliyatlar	mustahkam sog‘lik, yaxshi jismoniy tayyorgarlik va organizmning yuqori moslashuvchanlik ko‘rsatkichlariga ega bo‘lish; minerallarga qiziqish va ularning qidiruvidan zavqlana olish.
Fanlar	geografiya, matematika, fizika, kimyo, tasviriy san’at, chizmachilik, jismoniy tarbiya, ona tili va adabiyot, chet tili, “O‘lkashunoslik” to‘garagida shug‘ullanish.
Mazmuni	Kuzatuv-qidiruv ekspeditsiyalarida – tog‘-kon qazilmalarini saralash va ularga ishlov berish, tog‘-kon mahsuli hisoblangan qazilmalarning geologik hujjatlashtirilishi bilan shug‘ullanish, mineral xomashyoni qidirish ishlarini olib borish, quduqlar ekspluatatsiyasi texnologik jarayonlarining geologik kuzatuvini va nazoratini tashkillashtirish; Geologik yo‘nalishdagi ilmiy tekshirish institutlarida – foydali qazilmalar qazib olish konlarini topish usullarini ishlab chiqish, qattiq foydali qazilmalar va uglevodorod xomashyo resurslari va zahirasini geologik-iqtisodiy jihatdan baholash.
Afzalliklar	odamlar turar joydan uzoqdagi hayot romantikasi, kutilmagan so‘qmoqlarda bo‘lish; fan cho‘qqilarini zabt etish; ekspeditsiya vaqtidagi yuqori ish haqi; shaxsiy minerallar kolleksiyasini to‘ldirishning cheklanmagan imkoni; qiziqarli insonlar bilan muloqotda bo‘lish.
Kasbiy qiyinchiliklar	ekspeditsiyalardagi ish tufayli sog‘lik bilan, ba’zan esa hayot bilan tavakkal qilish; ekspeditsiyalarda uzoq vaqt qolib ketish oqibatida oilada muammolar kelib chiqishi.
Batafsil ma`lumot	Geologiya - Er haqidagi fan. Geolog – foydali qazilmalarni qidirish, er po‘stlog‘i qatlamlari, ularning tarkibi, qalinligini o‘rganiish bo‘yicha ilmiy materiallar to‘playdigan mutaxassis. Bu kasbni iqtisodiyot tomonidan talab qilinadigan kasblar sarasiga kiritsak bo‘ladi va bu tushunarli: mamlakatga energiya tashuvchilar, qurilish materiallari, metallar – bir so‘z bilan aytganda, foydali qazilmalar juda va juda kerak. Lekin geologiya faqatgina sayyoramizning erosti tabiiy boyliklarini qidirish bilangina shug‘ullanmaydi. Geologlar, er qatlamlarining tarkibi va strukturasi bilan birga, er qa’ridan ajralib chiqqan minerallarni ham o‘rganishadi. Bir-birining ustida yotgan qatlamlarning har bittasi sayyora mavjudligining aniq bir davrida er qatlami sifatida shakllanganligidan dalolat beradi. Er po‘stlog‘i qatlamlarining tuzilishi va tarkibi haqida diqqat bilan va muntazam tarzda ma’lumot to‘playotib, geologga har safar ham er tagiga kirishga to‘g‘ri kelmaydi. Tahlil uchun bemalol namuna olishning imkoni bo‘lgan katta tuproq massivlari kesiklarini ko‘p holatlarda tabiatning o‘zi yaratadi. SHunday bo‘lsa ham, kuzatuv geologiyasi – baribir sog‘lik uchun xavf soladigan kasb. Ha, geologlar ekspeditsiyalarda kutilmagan so‘qmoqlar romantikasi, olov atrofida gitara bilan aytiladigan ashulalar, konservalanib dimlangan go‘sht va quyultirilgan sut bilan oziqlanish, palatkalardagi o‘ziga xos hayotni boshlaridan kechirishadi. Kuzatuv geologlarida arxeologiya bilan umumiy ko‘p narsa bor. Ular ham, boshqasi ham bo‘lg‘usi ekspeditsiya mavzusiga tegishli bo‘lgan ma’ruzalar bilan batafsil tanishib chiqishadi, turli xil ilmiy jurnallardagi ma’lumotlarni tahlil qilishadi. Ekspeditsiyada esa geologlarga ham, arxeologlarga ham ekspeditsiya natijalari batafsil yozib boriladigan professional kundalik yuritishga to‘g‘ri keladi. Bu turdagi ixtiyoriy ekspeditsiya – sarf-xarajatli tadbir. Bundan tashqari, qazib olish ishlarini va tuproqni tekshiruvdan o‘tkazish uchun ruxsat olishga ham to‘g‘ri keladi. Geologlar faqatgina ekspeditsiyalarda va geologik tadbirlar olib boriladigan joylarda ishlashmaydi. Duch kelgan joydagi eng oddiy bino qurilishi ham fundament quyiladigan maydonda geologik tekshiruvlarni talab etadi. Geologlar, aytaylik, ko‘p qavatli bino yoki ishlab chiqarishssexini qurish qanchalik xavfsizligi, kommunikatsiya tizimini o‘tkazishda qanday muammolar kelib chiqishi mumkinligini aniqlashadi. Hattoki yo‘l yotqizilishi ham, uning turi, unga ishlatiladigan materiallar turiga asoslangan holda, geologik xulosa va tavsiyalarni talab qiladi. Biz Erda yashaymiz. Hamma vaqt, hamma joyda uning, Erning, “injiqliklari” bilan yashaymiz. Agar biror hovlidagi qurilish xavfsizligiga tegishli bo‘lgan geologik izlanishlar xato va kamchiliklar bilan o‘tkazilsa, oqibatda o‘ta jiddiy muammolar, hattoki yo‘qotishlarga duch kelish mumkin. Aytaylik, shifokorning xatosi bir insonni hayotdan olib ketadigan bo‘lsa, geolog qilgan xato esa ko‘plab kishilarning hayotiga yakun yasaydigan dahshatli halokatga olib kelishi mumkin. Sizni bunaqa mas’uliyat qo‘rquvga solmayotgan bo‘lsa, toshlar va ularni izlash jarayonining o‘zi katta qiziqish uyg‘otayotgan bo‘lsa, unda nega geolog bo‘lmasligingiz kerak?