Kimyoviy texnologiya
KASBI HAQIDA BATAFSIL MA`LUMOT

Yo'nalish Kodi	5320400
Kasbiy mutaxassisliklar	Kimyoviy ishlab chiqarish va texnologiyasi texnik-texnologi, shisha buyumlarini ishlab chiqarish texnik-texnologi, polimer kompozitlar, plastmassa va elastomerlarni kimyoviy ishlab chiqarish texnik-texnologi,ssellyuloza qog'oz ishlab chiqarish texnik-texnologi, sirlangan po'lat idishlarni ishlab chiqarish bo'yicha texnik-texnolog.
Ixtisosliklar	O‘rta maxsus (kimyoviy ishlab chiqarish texnik-apparatchisi, texno-kimyoviy tahlil laboranti, nazoratchi, elektroerozionist, shisha qolip mashinalari sozlovchisi, shisha pishiruvchi, polimer detallari va buyumlari elimlovchisi, vulkanizatsiya presslovchisi, gumirovchi, rezinotexnik buyumlar yig‘uvchisi,ssellyuloza va kog‘oz ishlab chiqarish texnik-texnologi) –sanoat va politexnika kollejlar; Oliy (kimyo texnologi) – kimyoviy-texnologiya va muhandislik texnologiyalari oliy o‘quv yurtlari.
Qobiliyatlar	mantiqiy aql “ombor”i, turli xildagi moddalar bilan ishlashga qiziqish, keng fikrlash doirasi, kimyoviy moddalarga nisbatan allergiya bo‘lmasligi talab etiladi.
Fanlar	kimyo, biologiya, fizika, matematika, jismoniy tarbiya, “YOsh kimyogar” to‘garagidagi mashg‘ulotlar, iqtisodiy bilim asoslari, ekologiya, ona tili, chet tili.
Mazmuni	Kimyoviy ishlab chiqarish tashkilotlarida – ishlab chiqarishni rejalashtirish va tashkillashtirish, ishlab chiqarilayotgan mahsulot sifatini nazorat qilish, ishlab chiqarish faoliyatining samaradorligini baholashda ishtirok etish, ishlab chiqarish maydonida xavfsizlikni ta’minlash, ishlab chiqarish va uning reglament bilan mos ravishda bosqichma-bosqich nazorat qilinishini amalga oshirish, asosiy yoki qo‘shimcha ta’minot va materiallardan samarali foydalanishni nazorat qilish, mahsulotlardagi nuqsonlarni tahlil qilish, ogohlantirish va nuqsonlarni tuzatish chora-tadbirlarini ko‘rish; Kimyoviy-texnologik yo‘nalishdagi ilmiy tadqiqot institutlarida – kimyoviy texnologiyalarni yaratish va rivojlantirish, kimyo sanoati korxonalari uchun ilmiy izlanish va loyihalashtirish ishlarini o‘tkazish.
Afzalliklar	sohadagi ixtiyoriy mutaxassislarga ehtiyojning yuqoriligi; doim o‘sib boradigan turg‘un ish haqi; ishlab chiqarish bo‘yicha karera qilish va sohaning etakchi kadrlar tarkibiga kirib olish imkoniyati; me’yorlangan ish kuni; yaxshi ish uchun qo‘shimcha xizmat ta’tillari va imtiyozlarning mavjudligi.
Kasbiy qiyinchiliklar	ishning jismoniy chidamlilik va ko‘p kuch talab qilish xususiyatiga egaligi; monotonlik; kimyoviy moddalar bilan ishlashning sog‘lik va hayot uchun xavfliligi va hamma vaqt xavfsizlik choralarini ko‘rish majburiyati.
Batafsil ma`lumot	Kimyoviy texnologiya – kimyo fanining xalq xo‘jaligida foydalaniladigan kimyoviy moddalar ishlab chiqarish va ularning muammolari bilan shug‘ullanadigan bo‘limi. O‘zbekistonda kimyo sanoati turlarining keng rivojlanganligini e’tiborga olsak, bu sohalar bo‘yicha ishlab chiqarishni hozirgi zamon darajasida tashkil etish va amalga oshirish uchun kimyoviy bilimlarga ega bo‘lgan ko‘p sonli yosh mutaxassislar kerak bo‘lib, ulardan kimyo va kimyoviy texnologiya asoslarini chuqur egallash talab etiladi. Lekin o‘quvchilarning ayrimlari kimyo fanining o‘zidan ham qo‘rqishadi. SHuningdek, bir tomondan, jamiyatda kimyoga tabiat zahri deb qaraydigan bo‘lib qolishgan, ikkinchi tomondan, iqtisodiyotni kimyosiz tasavvur ham qilib bo‘lmaydi. Bu shundan dalolat beradiki, kimyo- texnologi bo‘lishni istaganlarga bu soha bo‘yicha o‘qitiladigan oliy o‘quv yurtiga kirish uchun yaxshi imkoniyat bor. Bundan tashqari, ular uchun amaliyot o‘taydigan va bora-bora ularning ish joyiga aylanadigan kimyoviy ishlab chiqarish korxonalarini ham topish mushkul emas. Kimyo sanoati korxonalarining hammasi ham zararli emasligini ta’kidlab o‘tish joiz – kimyoviy ishlab chiqarish korxonalari bugungi kunda butun dunyo bo‘yicha zamonaviylashtirilmoqda – hattoki ularning eng zararlilarida ham o‘ta yuqori darajada xavfsizlik chora-tadbirlari ko‘rilmoqda. Bu borada YAponiya kimyo sanoati etakchi bo‘lib turibdi: ishlab chiqarishning chiqitlarsiz amalga oshish tamoyili xavfsizlik va ekologik tozalik bilan uyg‘unlashgan. Kimyo yo‘nalishida shunchalik ixtisoslik ko‘pki, hammasini ta’riflashning iloji, shuningdek, keragi ham yo‘q. Bo‘lajak texnolog uchun asosiysi – sohaning o‘zi bilan qiziqish, mutaxassislikni tanlash esa ortiqcha qiyinchilik tug‘dirmaydi, bu borada adashishingiz, amrimahol. Bu sohada ishlab chiqarishning ixtiyoriy turida o‘z o‘rningizni topishingiz mumkin, agar: shu kungacha kimyo fanida mavjud bo‘lgan tushuncha, nazariya va qonunlarni o‘rganib, uning mohiyatiga etish; kimyoviy moddalarning tuzilishi, tarkibi, xossalarini hamda ularning bir turdan boshqa turga o‘tish sabablari va oqibatlarini bilish; kimyoviy hisoblashlarni bajara olish; kimyoviy tajribalarni rejalashtirish, ularni amalga oshirish va bajarish uchun kerakli moddalar, jihozlardan foydalana olish bo‘yicha etarli darajada bilim va ko‘nikmalar orttirish; kimyoviy axborotlar yig‘ish va ularni o‘zaro almashinuv tajribasi va ko‘nikmalariga ega bo‘lish; olingan bilim va ko‘nikmalardan zarur hollarda va kasb faoliyati davomida hamda kundalik hayotda talab darajasida foydalana olish qo‘lingizdan kelsa. Xo‘sh, kimyoni o‘rganishga “chanqay” boshladingizmi? Siz kimyoviy ishlab chiqarishning xohlagan yo‘nalishida texnolog yoki texnologik liniyalar operatori bo‘lishingiz mumkin va bu erda ham, xuddi oziq-ovqat sanoatida bo‘lgani singari, texnolog bevosita ishlab chiqarilayotgan kimyoviy mahsulot retsepturasi bilan shug‘ullanadi, operator esa – ishlab chiqarish texnologik jihozlarining avtomatik ishlashini nazorat qiladi. Bir so‘z bilan aytganda, tanlang. Lekin yoddan chiqarmang: maktab va kollejda kimyo, biologiya, matematika, ekologiya va fizika fanlarini muntazam tarzda o‘qib borishingizga to‘g‘ri keladi. Omad yor bo‘lsin!