Telekommunikatsiya texnologiyalari
KASBI HAQIDA BATAFSIL MA`LUMOT

Yo'nalish Kodi	5311300
Kasbiy mutaxassisliklar	Telekommunikatsiya tizimlariga xizmat ko'rsatish va ta'mirlash texnigi, uzatish tizimlarini ishlatish va montaj qilish texnigi, Qo'riqlash-yong'in aloqasi va signalizatsiya tizimlaridan foydalanish texnigi, gidrometeorologiyada telekommunikatsiya va aloqa texnigi.
Ixtisosliklar	O‘rta maxsus (telekommunikatsiya tizimlari operatori, telekommunikatsiya tizimlari stansiya jihozlari elektromexanigi, optik-tolali aloqa liniyalari monatjchisi, xalqaro va shaharlararo aloqa texnigi, kabelchi-payvandchi; yong‘in-qo‘riqlash elektromontyori, yong‘inga qarshi kurashish inspektori; radiotexnik, radiolokatsiya stansiyalari operatori, aerolog) – gidrometeorologiya, aloqa va politexnika kollejlari; Oliy (muhandis-radiotexnik, muhandis-operator, dasturchi, axborot xavfsizligi nazoratchisi) – axborot texnologiyalari universitetlari, aloqa va texnika oliy o‘quv yurtlari.
Qobiliyatlar	mantiqiy fikrlash, texnika bilan ishlashga qiziqish, diqqatlilik, yaxshi ko‘rish qobiliyati va xotirasi, chidamlilik, chiziqli va burchak o‘lchamlarni aniq o‘lchay olish, uzoq vaqt esda saqlash qobiliyati.
Fanlar	fizika, matematika, elektronika, elektrotexnika, chizmachilik, informatika, ona tili, chet tili.
Mazmuni	Radio- va aerologik stansiyalarda - kompyuter tizimlariga texnik xizmat ko‘rsatish, tashkilotning butun axborot tizimlarini boshqarish; Ilmiy tekshirish institutlarida – radioelektron qurilmalar va tizimlarni loyihalashtirish, ularga texnik o‘zgartishlar kiritish, takomillashgan radioelektron apparaturalarni loyihalashtirish; Ishlab chiqarishda – radioelektron apparaturalarni ishlab chiqarish jarayonida ishtirok etish, mahsulotni texnik jihatdan nazorat qilish, ishlab chiqarish jarayonida foydalaniladigan elektron qurilmalarga texnik xizmat ko‘rsatish va ta’mirlash, tashkilotdagi elektron qurilmalarni boshqarish.
Afzalliklar	ishning ijodiy xarakteri; o‘zini texnik jarayonlarning yuqori marralarida, hech kim tushunmaydigan jabhalarda almashtirib bo‘lmaydigan mutaxassis sifatida his qilish; maishiy xizmat yo‘nalishida o‘z shaxsiy biznesini yo‘lga qo‘yish.
Kasbiy qiyinchiliklar	ishning ko‘p qunt va zehn talab qilishi; aqliy zo‘riqish; nizoli holatlar va avrallarga ega bo‘lgan ishning me’yorlanmagan xarakteri.
Batafsil ma`lumot	Telekommunikatsiya, gidrometeorologiya va aloqa bo‘yicha texnikning vazifalariga quyidagilar kiradi: Aerologik kuzatuvlar o‘tkazish; meteorologik radiolokatsion kuzatuvlarni olib borish, foydalaniladigan texnika vositalariga texnik xizmat ko‘rsatish va ta’mirlash; radiotexnik tizimlarni yig‘ish, sozlash, prinsipial sxemalarni montaj va elektromontaj qilish hamda uzel larni yig‘ish. Bundan tashqari, ular shassidagi uzellarni yig‘ish va kavsharlash, o‘tkazgich simlarni bosma montaj qilish yordamida uzellarda elektromontaj ishlarini olib borishadi. Radiotexnik kim? Radiotexniklik kasbi – radiomexnika kasbining “qarindoshi”. Ularning bir-biridan farqi shundaki, radiotexnik radioelektron qurilmalar va tizimlarni tuzatibgina qolmay, balki ularni mustaqil tarzda loyihalashtirib ham biladi. Har qanday texnika kabi, radioelektron apparaturalar ham katta o‘zgarishlarni “boshidan o‘tkazgan” holda, takomillashib bormoqda. Radioelektron asboblarni yig‘ish uchun qo‘lda juda ham ko‘p murakkab va nozik harakatlarni amalga oshirishga to‘g‘ri keladi. Elektromontaj ishlari esa oxirgi bosqich, ya’ni final hisoblanadi. Bu jarayonni, albatta, radiotexniklar amalga oshiradi. Aerolog kim? Aerolog atmosfera harorati va shamol tezligi va yo‘nalishini radiozondlar va radiolokatsion jihozlar yordamida aniqlaydi, erusti meteorologik kuzatishlarni olib boradi. Texnik vositalar yordamida aerologik va meteorologik kuzatuvni amalga oshiradi. Ha, bir so‘z bilan aytganda, ancha qiyin. Lekin texnika ulkan sur’atlarda rivojlanib borayotgan zamonda texnik sohalarni egallashning o‘zi, katta muvaffaqiyat. Buning uchun sizga qanday bilimlarni o‘zlashtirishingiz lozimligini aytib o‘tmoqchimiz: Fizika va radioelektronika, radiotexnika, radiolokatsiya asoslari; apparaturalar bilan ishlay olish, ularning tuzilishi va ishlash prinsiplarini; aerologik kuzatish tizimini tuzishning asosiy prinsiplarini; kuzatuvlar olib borish tartib-qoidalari, ma’lumotlarga ishlov berish, rejali va tezkor usulda aerologik ma’lumotlarni to‘plash va ularga ishlov berishni; atmosferada ro‘y beradigan hodisalar va jarayonlar o‘rtasidagi o‘zaro bog‘liqlikni; radio va teleapparaturalarni o‘rnatish, sozlash, ta’mirlash qoidalarini; nazorat o‘lchov asboblaridan foydalanish qoidalarini; amaliy dasturlash mahsulotlari va axborot tizimlari bilan ishlash usullarini; mehnat muhofazasi va texnika xavfsizligi qoidalarini. Faqat shundagina siz telekommunikatsiyaning haqiqiy mutaxassisi bo‘la olasiz. Muvaffaqiyat!