Elektronika va asbobsozlik - asbobsozlik
KASBI HAQIDA BATAFSIL MA`LUMOT

Yo'nalish Kodi	3310800
Kasbiy mutaxassisliklar	Avtomatika vositalari jihozlari va nazorat-o'lchov asboblarini montaj qilish, ishlatish va texnik xizmat ko'rsatish texnigi.
Ixtisosliklar	O‘rta maxsus (avtomatika vositalari va nazorat-o‘lchov asboblarini montajchisi, sozlovchisi, chilangari, elektrgazpayvandchi) – sanoat va politexnika kollejlari; Oliy (elektronika va elektr texnigi, o‘lchash va nazorat qilish asbob-uskunalari, metodlari texnologi, axborot-o‘lchov tizimlari texnologi) – muhandislik va texnologiya institutlari, texnika oliy o‘quv yurtlari.
Qobiliyatlar	o‘tkir ko‘z nuri, diqqat, detal va belgilarga nisbatan yaxshi xotira, chaqqon barmoqlar, bosiq xarakter, jismoniy chidamlilik, texnikaga qiziqish.
Fanlar	fizika, jismoniy tarbiya, ona tili, chet tili, elektrotexnika, informatika va axborot texnologiyalari,“Texnik ijodkorlik” to‘garaklaridagi mashg‘ulotlar.
Mazmuni	Sanoat, mashinasozlik va boshqa korxonalarda – nazorat o‘lchov asboblari va avtomatika vositalarini montaj qilish, ta’mirlash va texnik xizmat ko‘rsatish; ishlab chiqarish jarayonini avtomatlashtirishni boshqarish. Ilmiy-tadqiqot institutlarida va konstruktorlik byurolarida – nazorat o‘lchov asboblar va avtomatika vositalarining hamda avtomatlashtirish jarayonining yangi loyihalarini ishlab chiqishda ishtirok etish.
Afzalliklar	ishlab chiqarishning deyarli barcha sohalarida soha mutaxassislariga bo‘lgan yuqori ehtiyoj; ishning va ish haqining turg‘un xarakteri; ilmiy salohiyatni oshirish; ixtirochilik bilan shug‘ullanish va ilmiy karera yo‘lidagi keng imkoniyat.
Kasbiy qiyinchiliklar	ko‘rish va asab tizimining toliqishi, avral holatlarda ishlashga to‘g‘ri kelishi.
Batafsil ma`lumot	Hozirgi zamon mashinasozlik va boshqa ko‘pgina tashkilotlar turli xil nazorat-o‘lchov asboblari va boshqa ko‘pgina avtomatlar bilan jihozlangan. Barcha turdagi texnologik liniyalarning uzluksiz va serunum ishlashi ushbu asboblar ko‘rsatkichining to‘g‘riligi hamda ishga yaroqliligiga bog‘liqdir. Avtomatika vositalari jihozlari va nazorat-o‘lchov asboblarini montaj qilish, ishlatish, texnik xizmat ko‘rsatish texnigi – o‘lchov asboblari va avtomatlarning ishini nazorat qiladi hamda zaruriy holatlarda ularni ta’mirlash ishlarini bajaradi. Mutaxassisning ishi bir-biri bilan uzviy bog‘liq ikkita jarayonga bo‘linadi. Bu, o‘z-o‘zidan, nazorat o‘lchov asboblari, avtomatika vositalarining ishini ularning ish jarayonida nazorat qilish va sozlash bo‘lsa, ikkinchi tomondan, ishdan chiqqan bloklarni, korxona ustaxonasiniing boshqa qismlarini ta’mirlashdan iborat. Avtomatika vositalari jihozlari va nazorat-o‘lchov asboblarini montaj qilish, ishlatish, texnik xizmat ko‘rsatish texnigining ustaxonadagi ish o‘rni asboblar uchun zarur bo‘lgan maxsus yoritilganlik bilan ta’minlangan bo‘ladi. Bu chilangarlik asboblari va tokarlik dastgoh (stanok)lari, elektr o‘lchov asboblari: ampermetr,voltmetr, ossillograf va boshqalar. Ish smenali bo‘lib, tungi navbatchiliklar ham rejalashtirilgan. Sizda elektr o‘lchov asboblari bilan ishlashga, umuman texnikaga qiziqish bo‘lsa va ushbu kasbni egallamoqchi bo‘lsangiz, oldingizda qanday vazifalar turgani bilan sizni tanishtirishni lozim topdik. YA’ni soha mutaxassislari, birinchi navbatda, smena oldidan o‘lchov asboblari va avtomatlarining holatini nazorat qilish, jihozlarning ishga yaroqsiz bloklarini almashtirish, nosoz detallarni sozlash va ta’mirlash ishlari uchun mas’ul bo‘lishadi. Agar siz bu kasbni astoydil egallamoqchi bo‘lsangiz, elektrotexnika asoslari; hisoblash-echish qurilmasidan foydalanish va ishlab chiqarish jarayonlarini avtomatlashtirish bilan bog‘liq bo‘lgan asosiy tushunchalar; avtomatika vositalari va nazorat-o‘lchov asboblarining tuzilishi, vazifasi, ish prinsipi, ularni montaj qilishning texnik shartlari va usullari; asboblarni tekshirish qoidalari hamda payvandlash ishlari texnologiyasini puxta o‘zlashtirishingiz shart. Avtomatlashtirish sohasining eng etuk mutaxassisi bo‘lib etishishingizda sizga omad tilaymiz.