Sug‘urta ishi
KASBI HAQIDA BATAFSIL MA`LUMOT



Yo'nalish Kodi		 5231200

Kasbiy mutaxassisliklar		Sug'urta agenti yordamchisi.

Ixtisosliklar
  • O‘rta maxsus (sug‘urta to‘lovlari bo‘yicha mutaxassis, sug‘urta brokeri, sug‘urta menejeri) – iqtisodiyot va bank kollejlari;
  • Oliy (sug‘urta ishi) – iqtisodiyot va moliya oliy o‘quv yurtlari.

Qobiliyatlar		kuzatuvchanlik, yaxshi xotira, bosiqlik, ishontira olish, chiqishimlilik, o‘z fikrini ravon bayon qila olish.

Fanlar		iqtisodiyot, tarix, matematika, informatika, ona tili, chet tillari.

Mazmuni
  • Sug‘urta kompaniyalarida – mijozlarni faol izlash, firma va korxona, tashkilotlarga mulkini, xodimlar sog‘ligini va boshqalarni sug‘urtalash bo‘yicha takliflar berish, keng imkoniyatli mijozlar bilan bo‘lajak sug‘urta shartlari to‘g‘risida suhbatlashish, shartnomalar – sug‘urta polislarini rasmiylashtirish, sug‘urta holatlari to‘g‘risida guvohlik berish va etkazilgan zarar miqdorini baholash ishlarida sug‘urta agentiga ko‘maklashish;
  • Sug‘urta kompaniyalari bilan shtatdan tashqari xodim sifatida hamkorlik yuritishi mumkin.

    • Afzalliklar    		ezgu ish, shaxsiy sug‘urta kompaniyasini ochish; odamlar bilan doimiy muloqotda bo‘lish; shtatdan tashqari xodim sifatida ishlash imkoniyati.

    Kasbiy qiyinchiliklar    		raqobat va bankrotlik tufayli ishni yo‘qotish; me’yorlanmagan ish kuni; mijozlar va rahbariyat tomonidan e’tirozlarga uchrash ehtimolining yuqoriligi, ish vaqtining ko‘pincha qisqa muddatli safarlarda o‘tishi.

    Batafsil ma`lumot    		Bankrotlik, mulkni yo‘qotish, kasalliklar, jarohatlanish va boshqa baxtsiz hodisalardan hech kim o‘z-o‘zicha himoyalangan emas. Lekin o‘z mulkini, salomatligi va hattoki hayotini sug‘urtalash orqali insonlar favqulodda hodisalar tufayli ko‘rilgan zararni kamaytirish imkoniyatiga egalar. Hamma narsani sug‘urta qilish mumkin – mashinadan tortib o‘z tanasining qismlarigacha. Ha shunday, masalan, mashhur raqqos yoki raqqosalar, balet vassirk artistlari oyoqlarini, figurali uchish vakillari, ko‘p hollarda, tayanch harakat a’zolarini, degustatorlar hatto o‘ta sezgir tillarini sug‘urtalashadi.
    Sizda sug‘urta kompaniyalari yoki agentliklarida ishlash istagi bo‘lsa, faoliyatingizni sug‘urta agenti yordamchiligidan boshlashingizga to‘g‘ri keladi. Buning uchun, avvalambor, sug‘urta agentlari qanday xizmat vazifalarni bajarishlari to‘g‘risida ma’lumotga ega bo‘lishingiz muhim.
    Sug‘urta agenti - sug‘urta firmasi yoki sug‘urta ishlari bilan shug‘ullanadigan tashkilotning manfaatlariga ko‘ra faoliyat olib boradigan mutaxassis.
    U turli mulkchilik shakliga ega bo‘lgan tashkilotlar vakillari bo‘lmish jismoniy hamda yuridik shaxslarni izlab topadi va ularga xizmat ko‘rsatadi. Sug‘urta shartnomalari tuzishga qiziqtirish maqsadida mijozlar bilan suhbatlar olib boradi. Tavakkalchilik me’yor va darajalarini hisobga olgan holda, etkazilgan zarar miqdorini baholaydi.
    Sug‘urta agenti sug‘urta firmasi yoki sug‘urta ishlari bilan shug‘ullanadigan tashkilot shtatida turishi yoki shtatdan tashqari xodim sifatida sug‘urta shartnomalaridan tushgan foizlar evaziga faoliyat yuritishi mumkin.
    Sug‘urta agenti maqomi turli mamlakatlarda o‘ziga xos xususiyatga ega. Masalan, ko‘pchilik Evropa mamlakatlarida har bir sug‘urta agenti bitta sug‘urta kompaniyasi nomidan ish olib borsa, Amerika Qo‘shma SHtatlarida esa, sug‘urta agenti mustaqil tadbirkor sifatida, bir guruh sug‘urta kompaniyalarining vakili bo‘la oladi.
    Agar mutaxassis sug‘urta qilayotgan emas sug‘urtalanayotgan tomon manfaatlarini himoya qilsa, bu sug‘urta brokeri deb ataladi. U, sug‘urta agenti kabi, sug‘urta ishini olib boradi, lekin masalaga boshqa tomondan yondashadi. Uning vazifasi - ko‘pchilik sug‘urta qiluvchilar takliflari orasidan mijozning talablarini qanoatlantiradigan sug‘urta variantini tanlash. Buning uchun u sug‘urta kompaniyasidan emas, mijozdan vositachilik haqini qo‘lga kiritadi.
    Xususiy tadbirkor kabi, xodimlar shtatiga ega bo‘lgan yuridik shaxs ham sug‘urta brokeri bo‘la oladi.
    Bu soha mutaxassislari nimalarni bilishlari zarur?
    Sug‘urta qonunchiligi; bozor iqtisodiyotining iqtisodiy va huquqiy asoslari; sug‘urta kompaniyasi nazarda tutgan sug‘urta turlari va shartlari; sug‘urta hujjatlarini rasmiylashtirish qoidalari; etkazilgan zarar miqdorini baholash usullari; professional etika va xizmat ko‘rsatish madaniyati; muloqot qilish psixologiyasini.
    Siz uchun insonlar hayoti, sog‘ligi va boyligi qadrlimi? Agar shunday bo‘lsa, bu ish – sizniki.