Jismoniy tarbiya
KASBI HAQIDA BATAFSIL MA`LUMOT

Yo'nalish Kodi	5112000
Kasbiy mutaxassisliklar	Ixtisoslashtirilgan va boshlang'ich ta’lim muassasalari tarbiyachisi, maktabdan va sinfdan tashqari tarbiyaviy ishlar tarbiyachisi, jismoniy tarbiya va bolalar sporti bo'yicha murabbiy.
Ixtisosliklar	O‘rta maxsus (boshlang‘ich ta’lim tarbiyaviy ish tashkilotchisi, ixtisoslashtirilgan boshlang‘ich ta’lim muassasalari va mehribonlik uylari tarbiyachisi, umumta’lim maktablari va maktabdan tashqari to‘garak ishlari tashkilotchisi, ta’lim muassasalarida ommaviy-madaniy tadbirlar tashkilotchisi, sport turlari bo‘yicha murabbiy-yo‘riqchi, bolalar sport o‘yinlari bo‘yicha murabbiy) – pedagogika kollejlari; Oliy (boshlang‘ich ta’lim va jismoniy tarbiya o‘qituvchisi) – pedagogika institutlari va universitetlar.
Qobiliyatlar	kuzatuvchanlik, ko‘ngilchanlik, e’tiborlilik, sabrlilik, tashkilotchilik va chiqishimlilik xususiyatlari, norasmiy etakchilik mahorati.
Fanlar	ona tili va adabiyot, musiqa, tasviriy san’at, mehnat, tarix, biologiya, jismoniy tarbiya, psixologiya, chet tili, informatika va axborot texnologiyalari.
Mazmuni	Umumta’lim maktablari, ixtisoslashtirilgan boshlang‘ich ta’lim muassasalarida – bolalar xavfsizligini ta’minlash, ular bilan rejalashtirilgan mashg‘ulotlar va tarbiyaviy ishlarni tashkil qilish, maktabdan va sinfdan tashqari to‘garaklarni tashkil etish, tavsiya etilgan maxsus mashg‘ulotlarni o‘tish, sayrlar uyushtirish; Mehribonlik uylarida – bolalarning xavfsizligini ta’minlash, ular bilan bog‘liq kelishmovchiliklarni bartaraf etish, o‘zini tutishi va gigiena qoidalariga amal qilishlarini nazorat qilish, darslarni tayyorlashda ko‘maklashish, ular bilan o‘quv rejalari asosida shug‘ullanish, madaniy-ma’rifiy tadbirlarni tashkillashtirish; Bolalar sport muassaslarida - sport turlari bo‘yicha murabbiy-yo‘riqchi, bolalar sport o‘yinlari bo‘yicha murabbiylik qilish, ularning jismoniy xususiyatlarini rivojlantirish.
Afzalliklar	turg‘un ish o‘rniga ega bo‘lish, ko‘plab ijobiy ta’sirchanlik hislari va yangi taassurotlarni o‘z ichiga olgan xayrli, qiziqarli, ijodiy ish; bolalar va ularning ota-onalarining minnatdorchiligi; qulay va shinam binodagi ish.
Kasbiy qiyinchiliklar	o‘ta yuqori kasbiy mas’uliyat; ota-onalar va rahbariyat tomonidan ko‘pincha asossiz ravishda kelib chiqadigan e’tirozlar; ba’zida juda ham injiq va qaysar bolalar bilan ishlashga to‘g‘ri kelishi; maoshning nisbatan kamligi; mehribonlik uylarida – ko‘p kuch talab qiladigan, ruhiy jihatdan qiyin, hech qanday maosh bilan oqlab bo‘lmaydigan asabiy holatlarning kelib chiqishi.
Batafsil ma`lumot	Boshlang‘ich ta’lim muassasasi tarbiyachisi va sport murabbiysi – ta’lim muassasalarida bolalarni aqliy, jismoniy, axloqiy, mehnatsevarlik va estetik jihatdan rivojlantirish borasida ishlarni tashkil qiladi va olib boradi. Ularning ish jarayonida asosiy e’tibor bolalarning ijtimoiy faolligini oshirishga va o‘zaro munosabatlarini rivojlantirishga qaratiladi. Aniqrog‘i, ularning nutqini rivojlantirish maqsadida logoped tavsiya qilgan mashg‘ulotlarni o‘tadi, turli she’r va qo‘shiqlarni o‘rgatadi, so‘zlarni to‘g‘ri talaffuz qilish ko‘nikmalarini rivojlantiradi. SHuningdek, jismoniy mashqlar, chiniqtirish, dam olish va mashg‘ulotlarning qat’iy tartibiga, shaxsiy gigiena qoidalariga rioya qilgan holda, bolalarning salomatliklarini mustahkamlashga e’tibor qaratishadi. Bundan tashqari, tarbiyachilar bolalarda o‘z-o‘ziga xizmat qilish (nonushta, tushlik, kechki ovqatni tayyorlashda yordam berish, sinf xonasini turli bayramlar oldidan bezash...) orqali mehnatsevarlik hissini shakllantirishadi. Bolalarda uchraydigan zararli odatlarni bartaraf etish bo‘yicha ham tarbiyaviy ishlarni olib borishadi. Ularning individual xususiyatlari, qiziqishlari va qobiliyatlari, moyilliklari hamda yashash sharoitlarini o‘rganishadi. Tarbiyachilarning zimmasida bolalarning sog‘ligi va hayoti uchun katta mas’uliyat yotadi. Ular o‘z faoliyatlarida “Bola huquqlari to‘g‘risidagi Konvensiya” va ta’lim to‘g‘risidagi huquqiy – me’yoriy hujjatlarga, fuqarolik va mehnat qonunchiligiga, texnika va yong‘in xavfsizligi qoidalariga qat’iy rioya qilishga majbur.