Interer va mebellar dizayneri.
KASBI HAQIDA BATAFSIL MA`LUMOT




Yo'nalish Kodi
5151000

Kasbiy mutaxassisliklar
Interer va mebellar dizayneri.

Ixtisosliklar
  • O‘rta maxsus (ko‘rgazmalar, interer va jihozlar dekorator-rassomi, mebellarni loyihalovchi rassom) – dizayn, arxitektura, qurilish, madaniyat va san’at kollejlari;
  • Oliy (inteer dizayneri) – dizayn, arxitektura va qurilish oliy o‘quv yurtlari.

Qobiliyatlar
ijodiy va badiiy xususiyatlar, keng va boy tasavvur; rivojlangan estetik va badiiy did, kreativlik; predmetlarning nisbatini to‘g‘ri ola bilish; ranglarni to‘g‘ri tanlay olish; detallarga e’tiborlilik; og‘zaki nutq asosida obrazni yarata olish qobiliyati; fikrlashning moslashuvchanligi, konsentratsiyalash va loyihalash xususiyatlari.

Fanlar
matematika, chizmachilik, tasviriy san’at, informatika, mehnat, ona tili, chet tillari, dizayn, etika, estetika.

Mazmuni
  • Dizayn-studiyalarda – buyurtmalarni qabul qilish va loyiha g‘oyasini tuzib chiqish; umumiy konsepsiyani ishlab chiqish va shunga o‘xshash mavjud bo‘lgan loyihalarni tahlil qilish; eskiz-maketni tuzish, 3D modellashtirish; suvoqlash ishlari yakunlangach, intererga dekorativ bezak berish; binolarning tekstil dizaynini ishlab chiqish; quruvchilar ishini tashkillashtirish va buyurtmachilar bilan kelishuvlarni olib borish.

  • Afzalliklar
    yo‘q joydan ko‘rkam, go‘zal ko‘rinishdagi intererlarni yaratish va o‘z ishidan bahra olish, orom olish; yuqori ish haqi; buyurtmachilar hurmatiga sazovor bo‘lish; nufuzli korxonalar va mashhur shaxslar bilan ishlash; o‘z uyini ham betakror ko‘rinishga keltirish; butun dunyo tan olgan xalqaro toifadagi dizaynerga aylanish imkoniyati; o‘zining ijodiy qirralarini namoyon eta olish.

    Kasbiy qiyinchiliklar
    ish topish juda ham qiyin, ayniqsa boshlang‘ich mutaxassislar uchun; ishning injiqligi; nozikta’b mijozlar tomonidan ko‘rsatiladigan o‘ziga xos injiqliklar, har bir mijozning didi va xarakteriga moslashish.

    Batafsil ma`lumot
    Interer dizayneri ijodkor demakdir. U xonadagi oppoq devorlardan, kulrang pol, potolokdan butunlay tanib bo‘lmas darajadagi ko‘rkam, hamma havas qilgudek ko‘rinishni yaratadi. Ijod degani ham shu – yo‘q joydan zavqlanishga arzigulik nimanidir yaratish.
    Ushbu mutaxassis insonlarning ishlash, dam olish va, ayniqsa, yashash muhitini yaratadigan shasxdir. Mijozlaringizga xizmat ko‘rsatib bo‘lgach, uning uyidagi holatni tasavvur qilib ko‘ring: mijozingiz va uning oilasi har kun sizning mehnatingizdan rohatlanishadi, uyiga kelgan mehmonlar ham hatto sizni ko‘rmagan bo‘lishsa-da, havas bilan maqtashadi... biroq, yana bir gap bor – agarda nimanidir noto‘g‘ri qilib qo‘ygan bo‘lsangiz… bunda endi sizning manzilingizga boshqacharoq “maqtov”lar borib turadi. Lekin qo‘rqishga hojat yo‘q, chunki mijoz o‘z uyining ko‘rinishida kamchilik bo‘lishini istashi bo‘lmagan gap, shuning uchun ham sizning xatolaringiz hali loyiha amalga oshirilmasdanoq uning ko‘ziga yilt etib tashlanadi va darhol uni tuzatishingizni talab qiladi. Uni tuzatib bo‘lganingizdan keyingina, loyihada hech qanday xato va kamchiliklar qolmagandan so‘nggina loyihani amalga oshirishga ruxsat beradi.
    Interer dizayneri kasbining yana bir yaxshi tomoni shundaki, uning xizmatidan foydalanishga har kimning ham qurbi etavermaydi – ularga odatda puli ko‘p kishilar murojaat qilishadi. Bunday kishilar esa oddiylikni xohlashmaydi, noodatiylik esa hammaga qimmatga tushadi. Buni interer dizayneri timsolida ko‘radigan bo‘lsak, badavlat kishilar o‘z intererining ko‘rinishini “zo‘r” qilib tayyorlab bergani uchun mutaxassisni yaxshigina rag‘batlantirishadi.
    Lekin kasbning salbiy tomonlari haqida ham unutmaslik kerak. Eng yomoni shundaki, puldor, ammo didsiz odamlar sizga murojaat qilishsa. Ular bilan ishlash mutaxassis uchun har taraflama qiyin, chunki uning didi yaxshi shakllangan, ish tajribasi va mahorati ham shunga monand bo‘ladi, mijozda esa aksincha. Bu holat ish jarayonida asabiy va boshqa yoqimsiz holatlarni keltirib chiqaradi. Buning ustiga u o‘z mahoratini to‘liq namoyon qila olmaydi va o‘z ishidan rohatlanmaydi.
    Hali bular kasbning barcha qiyinchiliklari emas. Bu mutaxassis o‘zi yaratayotgan intererning har bir, hatto eng kichkina va zo‘rg‘a “ko‘zga ilinadigan” buyumlarga ham katta e’tibor qaratishi lozim: ular yaratilayotgan muhit bilan mos kelishi, ko‘rinishi noodatiy bo‘lishi, bundan tashqari, foydalanishga qulayligi va iste’mol sifati talabiga javob berishi mutaxassis ishiinng eng muhim tomonlaridir. SHu bilan birga, ushbu kasb egasi, intererni betakror ko‘rinishga keltirar ekan, undagi maishiy texnika, mebel, xo‘jalik jihozlari, va umuman, barcha-barcha buyumlarning ishlab chiqarish jarayoniga ham befarq bo‘lmasiligi kerak: u qanday moddadan tayyorlangan, bu modda inson hayoti uchun zararli emasmi, sifatli xomashyodan foydalanilganmi... . Axir interer va mebellar dizayneri yaratilgan intererning o‘zi va undagi buyumlarning nafaqat tashqi ko‘rinishi jihatidan e’tiborni o‘ziga jalb qilishini, balki foydalanish uchun barcha talablarga javob beradigan darajada bo‘lishini ham ta’minlashi kerak. Mana buni esa kasbnnig eng qiyin tomoni desak, mubolag‘a bo‘lmaydi. Bu endi sizdan o‘zgacha bir mahorat va tajribani talab qiladi.
    Ammo siz kasbning qiyinchiliklariga qaramay, baribir uni butun vujudingiz bilan sevsangiz, bir-biridan go‘zal intererlarni yaratish istagi bilan yonsangiz, nega endi kasbni egallamasligingiz kerak? Agar sizda o‘zgacha did, dunyoqarash va qobiliyat bo‘lsa, kasb tomonga bo‘lgan yo‘lingizni hech narsa berkitib qo‘yolmaydi.