Xizmat ko‘rsatish texnikasi va texnologiyasi
KASBI HAQIDA BATAFSIL MA`LUMOT

Yo'nalish Kodi	5610600
Kasbiy mutaxassisliklar	Maishiy xizmat texnikalari va kassa apparatlarini ta’mirlash bo‘yicha usta.
Ixtisosliklar	O‘rta maxsus (maishiy xizmat mashina va elektr jihozlarini ta’mirlash bo‘yicha texnik-mexanik, kassa apparatlarini sozlovchi texnik, “V” yoki “VS” toifali haydovchi) – sanoat, maishiy xizmat kollejlari; Oliy (xizmat ko‘rsatish texnigi va texnologi) – texnika oliy o‘quv yurtlari.
Qobiliyatlar	tashkilotchilik va bajaruvchilik xususiyatlari, rivojlangan fikrlash, ijodiy, texnik, amaliy fikrlash, mantiqiy va matematik xususiyatlar, kelishuvchanlik qobiliyatlari.
Fanlar	fizika, matematika, informatika, ona tili, chet tili, “Texnik ijodkorlik” to‘garagidagi mashg‘ulotlar, elektrotexnika, elektromexanika, texnika xavfsizligi.
Mazmuni	Ustaxonada, shaxsiy ofisda – kassa apparatlari va maishiy texnikalardan foydalanish shartlari, kamchiliklarini tahlil qilish, kassa apparatlarini ishga tushirish, nazorat kassa texnikasi va maishiy texnikaga texnik xizmat ko‘rsatish, maishiy texnika va kassa apparatlarini ta’mirlash, ta’mirlash ishlari sifatini nazorat qilish, qadoqlanadigan buyumlar va materiallarni nazorat qilish.
Afzalliklar	deyarli darhol qo‘lga kiritiladigan shaxsiy ish natijasidan rohatlanish; doimiy mijozlarga ega bo‘lish; o‘zining texnik qobiliyatlarini namoyon etish imkoniyati; kutilmagan ixtirochilik; maxsus jihozlanangan ofisda faoliyatini olib borish; erkin grafik bo‘yicha ishlash.
Kasbiy qiyinchiliklar	asab va ko‘rish tizimining toliqishi, ishning monotonligi; mijozlar bilan kelishmovchiliklarning kelib chiqish ehtimoli.
Batafsil ma`lumot	Hozirgi kunda maishiy xizmat texnikalari va kassa apparatlari inson hayotidagi eng muhim texnika vositalari sifatida namoyon bo‘lmoqda. Haqiqatan ham, kundalik hayotimizni ularsiz tasavvur qilish qiyin. Masalan, savdo do‘konlarida, avia- va temir yo‘l kassalarida, dorixonalarda, mobil aloqa kompaniyalarida, birinchi ehtiyojlarimiz bo‘lgan suv, gaz va elektr energiyasi to‘lovlarida biz, albattta, ularga duch kelamiz. Ko‘pchilik insonlar kundalik hayotda turli darajali murakkablikdagi elektron asboblar bilan ishlashadi. Savdo bilan shug‘ullanadigan hech qaysi tashkilot nazorat-kassa apparatlarisiz ishlay olmaydi. Lekin, afsuski, ba’zida texnika alohida detallarning buzilishi va eyilishi sababli ishdan chiqadi. SHuning uchun maishiy texnika va kassa apparatlarini ta’mirlash texnigi kasbi keng tarzda talab qilinadigan va yaxshi haq to‘lanadigan kasblardan biri. SHunday texnika vositalari bilan ishlashga qiziqsangiz, bu kasbni egallash siz uchun qiyin bo‘lmaydi. Lekin har qanday sohada bo‘lgani kabi, bu erda ham kasbni qo‘lga kiritish uchun zarur bilim va ko‘nikmalar talab etiladi. Ular haqida qisqacha to‘xtalmoqchimiz: maishiy texnika va kassa apparatlarini ta’mirlash texnigining ishi ikki usulda bo‘lishi, ya’ni ular mijoz aytgan manzilga borishlari yoki o‘z shaxsiy ofislarida ularning texnikalariga xizmat ko‘rsatishlari mumkin. Buning uchun, avvalambor, maishiy texnika yoki kassa apparatlarining buzilganlik sabablarini aniqlashi va tahlil qilishi lozim. Kassa apparatlarini ishga tushirish, ularni dasturiy ta’minlash, sozlash, texnik xizmat ko‘rsatish bilan bir qatorda foydalanuvchilarga ulardan to‘g‘ri foydalanish bo‘yicha maslahatlar berish ham ularning xizmat vazifasi hisoblanadi. Ularning faoliyatida eng asosiysi – ta’mirlash ishlarining sifati. Ushbu soha mutaxassisi ta’mirga muhtoj ob’ektning murakkablik darajasi va ta’mir ishlarining xarakterini ham inobatga olishlari maqsadga muvofiq. Kasbning mohir ustasi bo‘lish uchun bular hali etarli emas, chunki hali talabalik davrida elektrotexnika, elektromexanika asoslari va sohaga doir texnik adabiyotlarni o‘qimasdan, terminlarni bilmasdan turib, maqsadga erishish mushkul. Ha, aytgancha hozir xuddi mobil telefon apparatlari singari maishiy texnika va kassa apparatlarining ham son-sanoqsiz turlari ko‘payib ketgan. SHu bois, soha mutaxassisi sifatida, ularning barcha marka va modellarini, tuzilishi hamda ish prinsiplarini bilish juda muhim. Eng asosiylardan yana biri – ushbu texnika vositalaridan foydalanish va texnika xavfsizligi qoidalari, konstruktorlik, texnologik hamda boshqa me’yoriy hujjatlarda belgilangan yagona tizimga bo‘ysunuvchi asosiy qoidalarni bilish shart. Texnika bilan “oshna” bo‘lsangiz, siz nafaqat ularni ta’mirlash, balki o‘zingizning ijodiy qobiliyatlaringizni ham namoyon eta olishingiz, ya’ni kutilmagan ixtirolar muallifiga aylanishingiz mumkin, asosiysi – istak va iroda. Buyuk fizik aytganidek: “Fanning qanotlariga xayol tutashgan bo‘lsa, u yutadi”. (M.Faradey)