Musiqa ta’limi
KASBI HAQIDA BATAFSIL MA`LUMOT

Yo'nalish Kodi	5111100
Kasbiy mutaxassisliklar	Musiqa xodimi
Ixtisosliklar	O‘rta maxsus (maktabgacha ta’lim va maktabdan tashqari ta’lim muassasalari musiqa xodimi, musiqa to‘garagi rahbari) – san’at, madaniyat va pedagogika kollejlari; Oliy (musiqa ta’limi) – madaniyat va san’at institutlari, pedagogika institutlari va universitetlar.
Qobiliyatlar	Bolalarni sevish, musiqiylik, keng tasavvur, ijodiy qobiliyat, kuzatuvchanlik, ko‘ngilchanlik, e’tiborlilik, sabrlilik, tashkilotchilik .
Fanlar	ona tili va adabiyot, musiqa, tasviriy san’at, mehnat, tarix, anatomiya, jismoniy tarbiya, psixologiya, raqslar, chet tili, informatika va axborot texnologiyalari.
Mazmuni	Maktabgacha ta’lim va maktabdan tashqari ta’lim muassasalarida – pedagogik, uslubiy va musiqiy faoliyat, musiqiy mashg‘ulotlar ssenariylarini ishlab chiqish, yo‘nalishi bo‘yicha ta’lim dasturlarini yaratishda ishtirok etish, musiqiy tadbirlarni tashkillashtirish.
Afzalliklar	qiziqarli, ijodiy ish; bolalar va ularning ota-onalarining minnatdorchiligi; qulay va shinam binodagi ish, mehnat samarasidan zavqlanish.
Kasbiy qiyinchiliklar	yuqori kasbiy mas’uliyat va javobgarlik, har xil xarakterdagi va yoshdagi bolalar bilan ishlash qiyinchiliklari, ota-onalar va rahbariyatning ba’zida nohaq e’tirozlari.
Batafsil ma`lumot	Musiqa xodimi – bolalar va yoshlar bilan ishlaydigan, ularni ashula aytishga, musiqa asboblarini chalishga o‘rgatadigan, bayramlarda teatrlashgan musiqiy tomoshalarni tayyorlaydigan mutaxassis. U o‘quvchilarning musiqiy qobiliyatlarini rivojlantirishga, estetik didni shakllantirishga yordam beradi. Bu kasb bolalar bilan ishlashga bog‘liq bo‘lgan uchun musiqa xodimi har bir bolaning qalbida musiqaga mehr uyg‘ota oladigan yaxshi psixolog bo‘lish kerak. Qizig‘i shundaki, maktabgacha ta’lim muassasalarida musiqa xodimlari 1948 yildan boshlab faoliyat yuritishgan. O‘shangacha bu vazifani tarbiyachilarning o‘zlari bajarishgan yoki ba’zan bayramlarga tayyorgarlik ko‘rish va ularni o‘tkazishga kelgan musiqachilar yordam berishgan. Hozir O‘zbekistonning deyarli barcha tuman, shaharlarida zamonaviy talablarga javob beradigan shinam binoga hamda yuqori darajadagi moddiy-texnik ta’minotga ega bo‘lgan musiqa va san’at maktablari qurilib, foydalanishga topshirilgan. SHunday ta’lim maskanlarida tahsil olib, keyinchalik ulardan birida o‘z pedagogik faoliyatingizni yo‘lga qo‘ymoqchi bo‘lsangiz, kasbning qiyinchiliklarini engib o‘tishingizga to‘g‘ri keladi. Buning uchun siz tarbiyalanuvchilarning musiqiy qobiliyatlarini, hissiyot doirasini, ijodiy faoliyatini rivojlantirish; bolalarning musiqiy tarbiyasi bo‘yicha ota-onalar va boshqa pedagoglar bilan hamkorlikda ishlashingiz kerak. Bolalarning yosh va individual xususiyatlarini hisobga olgan holda, musiqiy mashg‘ulotlar ssenariysini ishlab chiqish; musiqiy bayram dasturlari va ssenariylarini tayyorlash va o‘tkazish, iqtidorli bolalarni aniqlash; pedagogik va uslubiy kengashlarda ishtirok etish va yana boshqa majburiyatlarni bajara olishingizga ishonasizmi? “Ha” bo‘lsa, bolalar va musiqa bilan oshna bo‘ling.